爸爸的針灸！

話說爸爸的頭痛病 on & off 到今日都未好，昨晚又再一次痛醒。但再睇西醫相信都係止痛餅＋止痛餅；或者叫爸爸去照下個肥頭肥腦。

爸爸在照肥頭肥腦前決定試下中醫！

在秘書姐姐介紹下，爸爸和陳醫師會面了！會面前爸爸發覺他很忙，忙於把檯頭上股票機中的數字抄落張紙度.... 爸爸諗陳醫師應該幾大生意下！

問症把脈後陳醫師話爸爸甚麼"肝風上頭"？？（something like that !!），簡稱"頭風"！

開藥後陳醫師問爸爸："針唔針？"

"針乜呀？" 一臉天真無邪的爸爸問道（重以為阿陳醫師問識唔識Jump Jump，可以打折添:-P）。

"針灸呀！" 陳醫師（眼神如望著一個智商上無可救藥的病人般）答道。

平時在孩子面前相當英明果斷的爸爸聽到個針字後立刻變得猶疑起來。思潮起伏.......究竟支針乾唔乾淨呢？陳醫師會唔會插錯位？會唔會流血不止呢？使唔使除衫呢？.........

但為著快點脫離頭痛病，在五秒的"死空氣"時間過去後，陳醫師表露不耐煩前，爸爸好勁咁答："針！"

"咁你出去等一陣先！" "吓，乜唔係即刻針咩，出去等等下我洩咗度氣唔敢針咁點算？...."

其實針灸比起爸爸想象中冇咁痛，爸爸一共被針了六個穴位；左右腳眼、左右拇指、額頭及右太陽穴。不過陳醫師攞著個好似電擊儀的機器係咁送pulse去我的穴位時個感覺好怪！以前冇機器時係唔係用內功呢？

唔知係咪心理作用，針完後雖然重係痛，不過好似輕鬆了點。希望飲埋劑藥會好啦！