We 're SICK family !!

爸爸媽媽常常同孩子講–We're HAPPY family !!
但最近林氏一族卻變成了–We 're SICK family !!

大孩子自從九月開學後一直有傷風 and/or 感冒，使到爸爸媽媽不斷地向他的主打醫生進貢。重搞到爸爸 join 唔到十一國慶之四雄會，阻止唔到一舊泥闖下有好大機會被追殺的彌天大禍...... :-P

愈寫愈遠添.....言歸正傳！！

話說昨天大孩子再去覆診，已經和林氏一族相當熟落的主打醫生問起一舊泥的近況。爸爸重好勁咁話好彩一舊泥身體強健（i.e. 肥胖），畀大佬放了接近一個月毒都冇事！！點知到烏鴉口爸爸真係唔講好過講......Orz

爸爸和大孩子返到屋企凳都未坐低，露比姐姐就話一舊泥打乞嚏及流鼻水......... )O(

"平時極度能幹的露比姐姐啊！點解妳唔可以係一小時零三分五十九秒前同爸爸講呢件那麼震撼人心的消息啊！好等我帶埋一舊泥去見主打醫生啊！打孖一齊睇可能可以打折呢？平兩蚊都好呀！"爸爸心裡面如此說。

最後爸爸媽媽決定觀察一舊泥多一晚......

晚上.........
可能係呼吸不暢順，一舊泥整晚都瞓得唔好，媽媽當然亦不能安睡。爸爸就更慘，頭痛到打孖隊特效必理痛都唔得，結果又係整晚都冇乜瞓.......

早上........
好不容易到天明，爸爸劇痛未止。以防萬一之下，決定和一舊泥一起去推動香港繁榮。 主打醫生話一舊泥只是外感，應該冇乜大礙。細心女醫生就話暫時當爸爸係偏頭痛，轉過隻頭痛餅，再痛先去照下個肥頭肥腦....

爸爸以為可以收隊及去開工啦，點知.....爸爸車的電池又再一次壞了，爸爸車又再一次在相同的停車場裡死火......啱啱上個月２５號先整過.....:-(

為咗趕返工，今次等唔切免費救車服務.......結果益了個的士大佬.....

同時爸爸腦海中浮現了呢句說話:-
人衰行路打倒遯！！

感恩事項：-
1. 頭部劇痛加成晚冇乜瞓的爸爸竟然可以安全地把車揸到維修中心及寫完呢篇BLOG！
2. 一舊泥只是外感。
3. 一舊泥巳經突破１８磅 ！！
4. 大孩子的幼稚園病持續好轉。
5. 媽媽及露比姐姐依然頂得住！^o^